Russian Defense Minister Gen. Sergei Shoigu chuan, “Soviet Union hun laia Zapad-81 (West-81) hnua a turu buru ber turin, Russia chuan “War Game” codename “VOSTOK-2018” (East-2018) tih chu Vladivostok hmunah Sept 11-15 khian neih tum a ni,” a ti. He war game hi NATO chuan uluk takin thlir an tum tih an puang nghal bawk.
Vostok-2018 war game ah hian Russian raldomi, sipai 300,000, indo thlawhna 1,000 leh indo lawng rual team 2 (fleets pahnih), Airborne Units zawng zawngte an tel bawk ang, an ri luih luihin, an ri rum rum mai dawn a ni.
Dylan White, NATO thupuangtu chuan, “Ram tinin war game chu an nei thei alawm, an zalenna leh dikna a ni. NATO ramte hriattir an ni a, ngun takin an che vel kan lo thlir dawn a ni” a ti. He war game ah China leh Mongolia sipaite pawh observers ang deuhvin an tel ve ang.
Japan chuan a ram chhak lawka Russian war game turu deuh neih tum hi a sawisel tawh a, hetih hun lai hian Vladivostok city ah World Economic Forum awmin, PM Shinzo Abe chu a tel ang. Russia hian indopui 2 hun laia a awpsak Japan ram hi pek let loh a la nei a ni.
Soviet Union an nih laiin, Russia chuan Zapad-81 (West-81) tiin military war game turu deuh a lo nei tawh a ni. Russian mipui thenkhatin, ram dinhmun economic chhiat laia War Game hautak zet neih chu an sawisel a, mahse, Kremlin thupuangtu Dmitry Peskov chuan, “Kan thian tha ni lo te chet vel dan leh tunlai khawvel thil awm dan thlirin, indo nunchan zir hi tih makmawh thil a ni” a ti.
Armoured vehicles 36,000, Tanks, Armoured Personnel Carriers, Armoured Infantry Vehicles etc chet theih dan a takin an enchhin dawn a ni. Indona lo chhuak thut pawh nise, an “ralthuam” lo tuaihnum hlurh mai chu Russian military te tih tur a ni a, “Ka vaibel” tih khawpin sipaiten an ralthuamte an lo hriat bel chu thil tul tak a ni.
US leh a thawhpui NATO ram thenkhat chu Iraq leh Afghanistan-ah indo nan hun hmangin, footballers ten World Cup lo awm leh tur atan exercise an lo la leh tan ang deuh maiin, US leh a thawhpui ramte hi chu indo turin leh “hmelmate sapela pel” turin, an fit deuh reng mai a; Russia erawhin 1980’s chhova Afghanistan a run lai leh tun hnaia Syria tualchhung indonaa a tel ve tihloh chu, intuai hriamna tura indona hmachhawn a nei tamlo a ni.
Author: CT Lalrinawma
No comments:
Post a Comment
COMMENT RAWH