America ram hmangaihtu dik tak, mi huaisen leh politician ropui, Republican Senator John McCain, kum 81 mi chu thluak cancer vangin a boral. Nikum July thla khan a thluakah bâwk a awm tih hmuhchhuah a ni a, Zirtawp khân a enkawlna damdawi pek tihtawp a ni a, Inrinni khan Arizona-ah a nupui fanaute leh a chhûngkhat lainate’n an dawm hlum ta a ni. A ruang hi Phoenix, Arizona leh Washington DC-ah an zalh phawt ang a, Washington National Cathedral-a an vui zawh hnuah Annapolis, Maryland-ah an phum dawn a ni. A vuinaah hian Obama leh George W Bushte’n thu an sawi ang.
Barack Obama chuan John McCain hi a ţha ber nia a hriat rinawm taka vawng duh mi, mi dik, mi rinawm a ni, a ti. Kan party inang lo mahse, ngaihdan inang loh chang leh inhnial chang nei ţhin mah ila, ka ngaisang a, America ram tan ţhahnem ngai taka a theihna zawng zawng hmang duh mi a ni, a ti.
George W Bush chuan John McCain hi ram hmangaihtu dik tak, America ram tan a ţha ber leh a sang ber duh tlat mi a ni, a ti bawk.
President Donald Trump chuan John McCain chhungte a tuarpui thu a thawn a, John McCain chungchang engmah a sawi lo. An inchaltauh zing bawk a! A vuinaah pawh Donald Trump hi an sawm dawn lo. First Lady Melania chuan Senator boral ta chu ram tan rawng a lo bawlna avangin a chunga a lawmthu a sawi.
Israeli Prime Minister Benjamin Netanyahu chuan John McCain chu America hnam pasalţha dik tak a ni, tiin a fak a, a rilruin Israel ram hi a thlahthlam ngai rêng rêng lo va, min thlawp tlat zêl a ni, a ti.
Canadian Prime Minister Justin Trudeau chuan mi entawntlâk, mi tam tak ngaihtuahna thar min neihtirtu (inspiration to millions) a ni, a ti.
John McCain hi mi ropui chhungkuaa piang leh seilian a ni a, a pu leh a pa hi America lawng sipai lal Navy admiral an ni a. Sipaiah a ţang a, Vietnam indo lai khan bomber pilot a ni a. A indo thlawhna chu Vietnam sipaite’n an kap thla a, kum 5 lung inah a tang a. A pa lawng sipai lal a nih avangin lung in aţang hian a chhuak thei a, mahse a tanpuite dang chuak si lo, a pa nihna avanga amah chauh chhuah bik chu a duh tlat lo. Kum 5 a tan chhung hian a hmelmaten an sawisa nasa hle a, a ke a bai phah a, a dam chhung zawng khan a ban hi a lu chungah a lek kang thei lo a ni.
Kum 1982 aţang khan politics a luh chilh a, vawi hnih US President a chuh ve a, a tling lo ve ve. Mi dik, mi tlang a ni a, a ruh lang rawt rawta a ngaihdan thlasik mau puah phawng phawng ching mi a ni. Kum 81 a dam chhung hian kum 60 chu vantlang rawngbawlna (public servant) atan a hmang a ni a, pa ropui tak a ni.
No comments:
Post a Comment
COMMENT RAWH