Pu Saikapṭhianga, Congress Sorkar-a Ex-Minister chuan, "Politics ka chawlhsan hma chu engmah ka sawi lovang ka lo ti ṭhin a. Thilhlui sawi chhuaha thawhpui ṭhinte beih beih hi ka duh dan a ni ngai lo. Ram kaihhruaia a ṭha zawnga hnathawh mai hi ka duh dan a lo ni ṭhin. Sawi vek duh ni ila vawi 9 MLA Candidate ka lo ni ve tawh a, 1978 aṭanga hmanni lawk thleng lo thawkho ṭhin kan ni a, sawi tur tam tak a awm. Mahse a vaia sawi vek kher pawh ṭul ka ti chuang lo. Amaherawhchu, tunah chuan min turtu hian nasa takin min tur a, kan hotute min tur pawh ka ni lo. Ka sawi ngai loh sawi tur hian nasa taka min turtu a awm tlat tawh a, MNF hruaituten an thiltih ni miah si lo, corruption leh thil dang danga an puhchhiatna thudik ni si lote hi sawifiah ve ṭul ka ti tlat tawh a ni," a ti.
"Pu Lalthanhawla, ka pu hlui hian Mizoram dinhmunah hian mawh zawng zawng a phur vek a ni. Tuna kan ram inrelbawlna chhe ta lutukahte hian mawhphurtu a ni a; tunhma aṭang tawh khan Project lian apiangah hotupa ber ho hian sen tur aia tam sen a ni ziah a, a hlawkna teltu chu hnaivai tak zel an ni ṭhin bawk. Central aṭanga sum tam tham tak tak lokal ṭhin Congress building-a bet zawng zawngte hi a tam tawh a ni," Pu Saikapṭhianga chuan a ti a.
Entirna sawiin, "Lengpui Airport siam dawn khan mawhphur tura ruat Minister-ten BRTF an dawr a, BRTF Lieutenant General phei chu Israel tlangval fel tak a ni nghe nghe a, cheng vaibelchhe 70-a thawh zawh vek theih tura inbiak fel vek a nih hnuah Chief Minister ber Pu Hawla hian a duh ta lova. A hnuah PWD changtu a nih angin PWD kutah dah a ni ta zawk a, ṭul hrang hrang awm sawi belh ṭeuhin a let deuhthawa tam sum sengrala siam a lo ni ta a, chu'nga Lengpui ram pawisa dawng list pawh sorkar hian a la kawl vek a ni. Tuirial Hydel Project-ah pawh Pu Zoramthanga chhungte Compensate lak avanga siam chhunzawm theih loh anga an sawifote hi khawiah mah Compensate lak vang tih Central aṭanga document inziak hmuh tur a awm lo. Tuna an khuah danah pawh hian Central-a UPA sorkar leh Mizoram sorkarin an pawngsual chiam avangin Project manto ber a lo ni ta hial a, vawiin thlengin a chhit man tur zat pawh an la bithliah fel thei lova, ni 24.4.2018 hian chhutfel an la tum chhunzawm dawn chauh a la ni," a ti.
Pu Saikapṭhianga chuan, "Pu Lalthanhawla hian sorkar hmasate thil ṭha lo ruahman tawh a chhunzawm duh ngai lo. Pu Ṭhena lo ruahman Bairabi Hydel Project pawh a chhunzawm duh lova, Aizawl khawpui tawt tihziawm nan Luangmual Govt Complex a lo ruahman pawh a hmaa ram neituten an nei let leh vek tawh alawm tih chhuanlamin a chhunzawm duh lova, a ram neituten an lo nei let tawp si lova, tunah chuan milian hoin ram an nei fer fur a, Lalriliani W/O Lalthanhawla, Zarkawt tih pawh ram neitu zingah hian a tel," tih sawiin Pass-na copy a lek chhuak.
"Serlui B Hydel Project-a kan lo thawh chinah pawisa awmsa zawng zawng kan hmanral vek hnuah Cabinet ngaihtuah turin ṭhulh leh mai rawtna a lo lut a. Chhuanlamah a khuaptu tur tlang velin a zo dawn lo tih leh Keite(Zawngral) pakhat a awm bawk si a tih a ni. Cabinet-a ngaihtuah tur thu lo lut reng reng hi CM thu leh a remtihna lo chuan a lut ngai lo. Tuikhuah chu ṭhulh a ni ta ringawt a, hei tunah 12 magawatts pe chhuak theiin Pu Zoramthanga'n engtin tin emaw a tih dan dap ṭha lehin project siam dan ṭha berin a rawn tipuitling ta a, chuti chung pawhin a ngaihsakzui duh chuang lo. Chutiang zelin Refferal Hospital-ahte pawh hmalak chhunzawmna an nei lova, sawiselah chauh an ramṭang. Pu Zoramthanga sawichhuah, budget sum pawh ni lo a thlawna kan hmuh Peace Bonus te, BAFFACOS te, chumi avanga buhfai a thlawna mipuiin kan dawnte pawh sawiselna ringawt an vawrhdarh a. Mawza manto leh Ekin kal thei tia sawiselna lo awn ṭhinte pawh khatih laia Kan Police Officer DGP thihnaah khan a sawifiahna dik tak ziakin siam a lo ni ta. Kha kha a nih dan dik tak chu a ni," Pu Saikapṭhianga chuan a ti bawk.
Aizawl khawpui aṭanga Assam Rifles sawn chhuah chungchang sawiin Pu Saikapṭhianga chuan, "Mizoram leh Manipur-a Assam Rifles-in hmun an luahte hi inlaichin kal dun zel a ni. Imphal khawpui chhunga Kangla Fort-a Assam Rifles awm ṭhinte chu hmeichhe pakhat pawngsualna thleng avangin mipuiin nasa taka an nawr takah 2004 December khan khatih laia Home Minister Pu Shivraj Patil khan Assam Rifles awmna chu mipui kutah a pe let a, a hnu ni 31.1.2005 khan Pu Shivraj Patil chu Pu Jaiswal, Minister of State hruaiin Mizoramah an lokal a, Bawngvaah Assam Rifles awmnaah rawn ṭumin Aizawlah an lo lut a. Kha ta an rawn tihfel tum chu Assam Rifles ram luah mipui hnena peklet a ni. Kan sual khawp a, Congress khan MNF sorkar laiin thilṭha a thleng ang tih hlauin nasa takin kan lo dodal a, Governor Bangla-ah Pu Shivraj Patil chuan Assam Rifles sawn chhuah chu a hma thei angin tihfel tum a ni ang tiin a sawi ta ringawt mai a nih kha. Kihhnawkah Pu Zoramthanga sorkar kha a tang ve lo, tih tur kha an thawk mawlh mawlh mai zawk a ni," a ti.
"India sorkara Prime Minister leh Minister-te mai pawh ni lo, sorkar hnathawk milian pui puite hian MNF hruaitute hi an ring a ni tih ka sawi duh a, Congress sorkar pawh khan an ring. Mahse helaiah kan lo sual em mai a, chu chuan harsatna a siam ṭhin zawk a ni. India sorkar hian 1965-ah Naga helte inremna a siampui a, a hlawhchham. Punjab-ah Khalistan, Assam-ah helho inremna a siampuite a hlawhchham zel a. India sorkar leh MNF kum 1986-a an inremna chu za-ah zain a hlawhtling. Vawiin ni thlengin remna tichhe zawnga chetna leh lungawiloa hmalakna sawizui tur a awm ve tlat loh avangin India sorkar leh Intelligent lam, RAW-hote thleng hian MNF hotute hi an ring tih ka sawi duh a ni," Pu Saikapṭhianga chuan a ti bawk.
Author :
Chhana Vidic Vanchhawng
No comments:
Post a Comment
COMMENT RAWH