Khawvel football club hausa ber leh huhang ngah Manchester United hi kum 1878 khan Newton Heath LYR Football Club tiin a din a ni a. 1902 ah tuna a hming Manchester United tih hi a lo pu ta a, hemi kum hian Old Trafford pawh hi an luah nghal. Manchester United hi Manchester khaw club pakhat zawk a ni a, Greater Manchester-ah awm hmun an khuar a ni.
United hi English football thununtu an ni ṭhin a. League title (Premier League title - 13) hi vawi 20 an la tawh a, English club zingah an ni aia title la tam an awm lo. FA Cup - 12, League Cup - 5, FA Community Shiels - 21, UEFA Champions Leagues - 3, UEFA Europa League - 1, UEFA Cup Winners' Cup - 1, UEFA Super Cup - 1, Intercontinental Cup - 1, FIFA Club World Cup - 1 te la tawhin 1998-99 season khan treble champion niin, League title, FA Cup leh Champion league title an la a ni.
Kum 1958 ah khan Munich Disaster an tihah khan United player 8 in nunna an chan a, kha ṭuma an boss Matt Busby-a ho khan United hi siam thar leh niin 1968 khan English Club zinga a hmasa ber ni turin European Cup an chawi. United boss ni rei ber Sir Alex Ferguson khan trophy vawi 38 a chawi a, heng zingah hian Premier League title 13, FA Cup - 5 leh Champions League title 2 te an ni.
Manchester United hi khawvela club hausa ber an ni mek a. An club hlutna hi 3.1b a ni. Kum 2005 khan United hi Malcom Glazer chuan £800m in a lei a ni.
A tobulah aw
Sawi tak ang khan Manchester United hi 1878 khan Newton Heath LYR Football Club tiin din a ni a. A dintute hi Lancashire and Yorkshire Railway a Carriage and Wagon department an ni. A tirah chuan department dangte leh Railway company te nen an inkhel ṭhin. 1980 aṭang khan football club pangngai te nen an inkhel chho ṭan a. An khelh hmasak berah Bolton chu 6-0 in an hneh lo pang nghal. 1888 khan an bial chhunga football league-ah member pakhat an ni a. He league hi kum khat a kal hman tihah an chhuah san a, Football Alliance an zawm. Hemi hnu hian Football Alliance leh Football League hi huangkhatah a kal ta a ni. First division league khelin a kum hnihnaah second division-ah an relagate. An club hming aṭangin LYR tih chu paih a ni bawk.
January 1902 a ni a, Club chuan leiba £2,670 lai mai an nei a. An talbuai chho ṭan ta. Mahse, an captain Harry Stafford-an ṭan nasa takin a la a, Club din thar leh thei tur zawngin, sumdawng hausa pali a hmu ta. An ni hian £500 chu thawhin, Club chu an din thar leh ta. Club din thar tu zingah ah hian a hnua President ni ta John Henry Davies chu a thawhhlawk hle. Hemi kum aṭangin hian Manchester United tih a lo ni ta a ni.
United din thar a nih hian Ernest Mangnall chu an manager atan lain, second division aṭangin 1906 khan first division-ah an inhlangkai leh ta a. Kum 1908 a lo thlen chuan first division champion an nih pui ta a ni. Hemi hnu hian Charity Shield leh FA Cup an chawi leh bawk a. Kum 1911 khan First division champion an ni leh a, hemi hni kum hian an boss Ernest Mangnall chuan Manchester City a zawm san.
Kum 1922 a ni a, khawvelah indopui pakhatna huhang a na hle mai. United pawh second division lamah an tla thla leh a. 1925 ah First division lamah an kai leh. 1931 ah chuan second division lamah awm hmun an rem leh a. 1934 kumah phei chuan second division ah a mawngphah an ni. October 1927 ah Club President John Henry Davies chu a boral a. Leiba tam tak nen United chu a awm leh ta. Mahse, chhandamtu a lo lang leh ta. James W. Gibson chuan £2,000 chu United sumbawmah a rawn dah lut veleh ta. United chu dang pangngai angin a kal leh thei ta a. Kum 1938 - 39 ah chuan first divisionnah 14-na an rawn ni chho leh tawh.
The Busby Babes
October 1945 a ni a, United chuan an boss thar atan Matt Busby an lalut a, ani hian United hmel chu a rawn tidanglam dawn. Tun hmaa board lamah player selection, transfer leh training lam an khawih ṭhin chu, amahin a khawih ta vek a. Kum 1947, 1948 leh 1949 ah te United chu League-ah pahnihna a nih pui a, 1948 ah hian FA Cup an la bawk. Kum 1952 ah League champion an ni ve ta a ni. Heta United player te hi chawhrualin kum 22 mi deuh vek an ni a. Busby hian rawlthar rual a hmang nasa a. Player te pawh 'Busby Babes' tia hriat an ni.
Kum 1958 a ni a, United chu a vawihnih nan European competition-ah an inlan a. Hemi ṭum hian Red Star Belgrade chu semi final-ah an hneh. Heta an lo haw kawng hi Khawvelin a hriat reng zui tak chu a ni. United thlawhna, players, officials leh chanchinbumite phur chu Munich, Germany ah tui thunin a chawl a. Heta an thlawk chhuak tur hi an chuanna thlawhna hi a kang ta. Hemi ṭum hian United player 23 an thi a. Geoff Bent, Roger Byrne , Eddie Colman, Duncan Edwards , Mark Jones, David Pegg , Tommy Taylor leh Billy Whelan te chuan hliam na tak an tuar bawk.
Munich Disaster-ah hian Busby hian hliam a tuar a. Hna a thawh theih loh chhung hian Asst. Manager Jimmy Murphy chuan United hi enkawlin FA Final a hruai thleng a, mahse, Bolton lakah an tlawm. UEFA chuan chhiat an tawh avangin United chu league-ah an champion lo nachungin 1958–59 European Cup khel turin an ti a. Mahse, FA lamin an qualified loh avangin tel a phal lo. Busby a rawn dam ṭha chhova. United chu a rawn din thar leh ta. Busby hian Denis Law leh Pat Crerand te lalutin, an ni leh George Best-a hovin 1963 khan FA cup an chawi leh. 1964 ah league-ah pahnihna an ni a. Kum 1965 leh 1967 ah league champion an rawn ni chho leh ta. 1968 ah Benfica hnehin European champion an ni a. Bobby Charlton chu European player of the year ah thlan a ni nghe nghe. Kum 1969 ah Matt Busby chuan United a chhuah san a. A hmun hi reserve team coach Wilf McGuinness chuan a luah ta a ni.
Busby leh Ferguson inkar
1969–70 khan League-ah 8-na an ni a. 1971 season ṭan tir khan an che chhe em em a. An boss hlui Matt Busby chu an kokir leh hial a. McGuinness chuan a hna ngai a chelh leh. Busby hian kum khat pawh United boss a ni lo, a bang leh. A aiah Frank O'Farrell chu United boss atan ruat a ni a. A ni hian thla 18 chhung hna a thawk hman tihin Tommy Docherty chuan 1972 khan a rawn thlak veleh. Hemi kum hian Tommy Docherty hian United chu division hniam lama an tla tur a chhanchhuak a. Mahse, 1974 ah erawh division hniam lamah an tla ta tho. Hei hi a chhan chu an player ṭha pathum, Best, Law leh Charlton ten United an chhuah san vang a ni. Kum 1976 ah United chu First division-ah inhlangkai lehin, FA Cup final an thleng a, mahse, Southamton lakah an tlawm. Kum 1977 a lo inher chhuak a, United chuan Liverpool hnehin FA Cup an chawi leh ta. Club hotu pakhat nupui nen boruak an neih deuh avangin Doherty chu manager a nihna aṭanga chawlh tir a ni.
Kum 1977 ah Dave Sexton chuan Doherty chu thlakin, a ni hian player lian tham lalut lo nachungin, Joe Jordan , Gordon McQueen, Gary Bailey leh Ray Wilkins tw ho nen 1979–80 season khan league ah pahnih an ni a. FA Cup final-ah Arsenal an hneh lo.
Sexton chu 1981 khan ban a ni a. A aiah Ron Atkinson chu United boss atan lak a ni. A ni hian British Transfer fee in West Brom aṭangin Bryan Robson a lalut a. Atkinson hian 1983 ah leh 1985 ah FA Cup a chawi nghal. 1985-86 season khan League-ah an match hmasa 15 ah vawi 13 chakin, vawi 2 draw an nei a. Champion tura beisei an ni laiin league 4-na an ni a. Season lehah United chu league hniam lama tla mai thei an nih vangin Atkinson chu ban a ni veleh.
*Ferguson-a hun a thleng ve ta*
Atkinson ban a nih hnuin Aberdeen boss Alex Ferguson chu a assistan nen Archie Knox nen Old Trafford-ah hruai luh an ni. Alex hian a season khatnaah United chu 11-na a nih pui. Kum 1988 ah chuan League-ah pahnihna an ni a, a kum lehah 11-na an ni leh. Beisei angin Alex hi a chet ṭhat mai loh avangin ban hial tum a ni. Kum 1990 a ni a, FA Cup ah Crystal Palace hnehin an champion a, hei hian Alex-a hi a chhanhim ta a ni. Hemi kum dawt chiaha hian Cup Winners' Cup title an la a, UEFA Super Cup title an la bawk. 1992 ah League Cup ah Nottingham Forest hnehin an champion zui bawk. Kum 1993 a lo her chhuak a, United chuan a vawi hnih nan League title an la a, FA Cup an chawi bawk.
Kum 1998-99 season kha United tan kum ṭhat kum a ni. A chhan chu United hian Premier League, FA Cup leh Champion League title lain, Treble champion an nih vang a ni. United hian Tokyo ah Palmeiras hnehin Intercontinental Cup title an la bawk.
United hian 1999, 2000 leh 2001 ah te khan League title an la a. 2002 khan pathumna niin, 2003 khan pakhatna an rawn ni leh. 2003-04 khan Milwall hnehin FA cup an chawi leh a. 2005-06 khan United hi a vawikhat nan champion league an khel pha lova. Mahse, League-ah pahnihna niin, League Cup ah Wigan hnehin an champion. 2007 leh 2008 khan United hi PL ah an champion leh a. Moscow-ah Chelsea hnehin Champion League ah an champion leh bawk. 2008 khan 2008 FIFA Club World Cup title an la a, 2009 khan League Cup title an la bawk a, PL title an la bawk. Hemi kum nipui transfer ah hian Ronaldo chu Real Madrid lamah hralh a ni. 2010 ah United hian Aston Villa hnehin League cup an chawi leh a. Hemi kum hian PL ah pahnihna an ni a. A kum leh 2011 ah PL champion an ni leh. 2012-13 PL title lalehin United hian League title (Premier League title 13) an la ta a ni.
Ferguson-a hnu lam
United boss Sir Alex Ferguson chuan May 8, 2013 khan a ban tur thu a sawi ta. Mahse, United ah hian director leh Club Ambassador angin a la awm dawn. United chuan July 1, 2013 khan Everton manager David Moyes chu kum 6 chhung atan an lalut nghal. Mahse, Moyes hian United hi a chet ṭhat pui loh vangin April 22, 2014 khan ban a ni a. A aiah Ryan Giggs chu player-manager angin chhawr chhun zawm a ni. Hemi kum hian PL title an hum zo lova, Champion League an qualify zo lo bawk.
May 2014 khan United chuan an boss aṭan Louis Van Gaal chu kum 3 chhung atan an lakluh thu an puang a. Giggs chu a assistant a ni nghal. May 28, 2018 khan club neitu la Malcolm Glazer chu a boral zui bawk.
Van Gaal-a hnuaiah hian United chu League-ah palina niin, UCL an khel thei a, a kum lehah pawh Group stage paltlangin UCL hi an khel leh hram. Van Gaal a hnuaiah hian United hian League-ah 5-na an ni a, FA cup erawh a vawi 12 nan an chawi.
FA Cup ah champion pui mah se Van Gaal hian kum 2 chhung a lo chenchilh tawh United chu chhuahsanin, a aiah May 27, 2016 khan Jose Mourinho chu United boss tan ruat a ni. A season hmasa berah hian Mourinho hian United chu PL ah 5-na a nih pui a, Aug. 7, 2016 ah Leicester City hnehin FA Community Shield a lakpui nghal. 2017 kum tir lam khan Southamton hnehin EFL Cup a chawi pui leh. May 24, 2017 khan Ajax hnehin Europa Cup a chawi pui leh a. United hian PL ah top 4 ah awm lo mahse, Europa champion an nih vangin UCL an khel pha bawk.
Manchester United tantute lam ve thung
Manchester United hi khawvela Football Club lar ber te mi a ni a. Europe ah phei chuan an home-a inkhel entu ngah ber an ni bawk.
Tunah hian Manchester United Supporters Club hi khawvel ram 24 ah Branch hi 200 chuang an ding tawh a. Deloitte in a tarlan danin, United hian ṭantu (fan) hi khawvel pumah 70m a nei a. Thenkhat chuan 333m niin an chhut bawk. United hian Facebook lamah 71m fan a nei bawk.
No comments:
Post a Comment
COMMENT RAWH