MNF Ṭhalai ten sorkar an dem.

MNF ṭhalai Pawl, MNYF chuan ramri venhimna kawngah leh ILP chungchangah sorkarin chak zawkin hma la rawh se, an ti.

MNYF hian vawiin khan Aizawl Press Club-ah chanchin thar thehdarhtute kawmin, MNYF President, MLA Pu Lalrinawma chuan, Assam National Register of Citizens (NRC) draft final list tihchhuah a nih rual khan state ṭhenawmte chu an inralring nghal hle a. Arunachal Pradesh, Manipur, Nagaland leh Tripura state sorkar te chuan kawng hrang hrangin an theih ang tawk tawkin ramri-ah venhim hna an thawk a, Mizoram sorkar hmalakna erawh hriat tur mumal a awm lo a ni, a ti a. Hei hi MNF ṭhalaite chuan pawi an ti em em a ni, a ti.

Kar hmasa Thawhṭanni aṭanga check gate pathum-a MZP an duty leh kar khat chhung leka Assam NRC list-a tel lo Mizorama rawn luh tum mi 400 chuang an man chhuak chu lawmawm an tih thu MNYF President chuan a sawi bawk a. MZP hmalakna hi an thlawpzia lantir nan nimin khan Assam ram aṭanga Mizoram luhka hmun thum - Bairabi, Vairengte leh Saiphai Police check gate zinga pahnih Bairabi leh Vairengte Police check gate-a MZP duty-te tlawhin a ṭul apianga an hman atan ṭanpuina an hlan a ni, a ti.

Ramdangmite Mizorama an duh duha an lo luh loh nan sorkarin state level leh district level emaw, village level emaw committee din se, chutah chuan NGO hrang hrangte thawhpuiin hnam dang mi lut tharte dap chhuah hna thawk se an duh thu bakah sorkarin ILP a pek chhuah danah khauh lehzualin hma la se an duh tih MNYF President cuan a sawi a ni.