HUAPZO SORKAR kan din dawn - Tawnluia

Mizo National Front
General Headquarters
Mizoram : Aizawl

Press Release

Mi zawng zawng tel theihna leh mi zawng zawng lenna HUAPZO SORKAR kan din dawn
             - Tawnluia

Vawiin August ni 27,2018 (Thawhtanni) hian MNF Tuichang North Block 'Workers Meet cum Mithar Lawmluhna' program, Zaingen YMA Hall, Khawzawlah neih a ni a. He hun hi MNF Sr Vice President Pu Tawnluia'n a hmanpui a, Tuichang MNF North Block huam chhunga Khawzawl leh a chhehvel khuate aṭangin mithar 486 MNF-ah a lawmlut a, hengte hi Congress 425, ZNP 24, Neutral 26, BJP 7 leh ZPM 4-te an ni.

Pu Tawnluia chuan thusawiin, "Mizo Nationalism humhima chumiah chuan mipui hlim taka kan awma kan sakhua kan humhim a tul a. Chuvangin keini MNF chuan 'Pathian leh kan ram tan' tiin Pathian hming lam hmasain ke kan pen a ni. MNF hi kan sorkar a nih chuan mi zawng zawng tel theihna leh mi zawng zawng lenna Huapzo Sorkar kan din dawn a; mipui belhtlak sorkar a ding ang a, Lal chhungkaw sorkar kan din ve dawn lo. Chu Huapzo Sorkarah chuan sum leh pai duhamna avanga kan zahawmna kan hralh ṭhinna hi MNF chuan tihreh kan tum dawn a, corruption tihreha umbo kan tum dawn a ni. Decentralisation of power a takin kan kengkawh ang a, Langtlang Sorkar kan siam ang a, local self government awmze nei siamin, district level-ah Development Committee kan din bawk ang," a ti.

Pu Tawnluia chuan SEDP chungchang sawiin, "Kan ei leh bar, sum leh pai hai chhuahna thuah chuan SEDP hmangin mipui zawng zawngte an dinchhuahna tur MNF chuan programme kan nei a, a takin SEDP hi kan kalpui dawn a, hnam martar leh an chhungte leh Returnee-te khaichhuahna tur pawh SEDP-ah hian kan dah a, ngaih pawimawh bik an ni dawn a ni," a ti a.

"Kan khawtlang nun tichhetu zu leh drugs hi kan sorkar chuan kan do dawn a, zu kan zuar ve dawn lova, kan titawp ang. Hindutva tihte hi MNF chuan kan pawm lo. Bawng talh khap pawh kan pawm lo. Sorkar anga Yoga lo practice pawh hi kan tum ve lo. Kan Kristianna kalh thil reng reng keini MNF chuan kan lo sorkar a nih chuan kan ti ve dawn lo a ni. Hengte bakah hian Congress-in sikul kal hun a tihdanglam pawh hi kan ennawn dawn a, Mizo Society milin sikul timing hi kan siamṭha dawn a ni," Pu Tawnluia hian a ti bawk.

Chunglam malsawm tlaka hnathawk thei tura nun a pawimawh ber tih sawiin, Mizoram mipuite hnenah MNF sorkartir leh tura ngenna a siam a, "Kum 10 liamtaa kan sorkar hmasaah khan tihdikloh tam tak kan nei tih kan inhria a, Mizo mipui zawng zawngte chunga kan lo tihdiklohahte leh Khawzawl Block leh Unit-te hnenah ngaihdsm ka dil tak meuh meuh che u a ni," Pu Tawnluia chuan a ti.

He hunah hian MNF Adviser Pu Liansuama, Secretary Pu Ngurzamlova leh Chief Organiser Pu BC Lalbiakngura-ten thu an sawi bawk a. Inkhawm hi Pu H.Lalhmachhuana, President, Tuichang MNF North Block-in a kaihruai.


(LALTHANZUALA HNAMTE)
Secretary
Media &Publicity Dept.
Mizo National Front
Memo No.MNF/Media/2018/01/281
Dt.27.08.2018.