Pawngsual leh mipat hmeichhiatna kaihhnawiha pawikhawihna tuartu naupangte tanpui dan tur training nei.

Pawngsual leh mipat hmeichhiatna kaihhnawiha pawikhawihna tuartu naupangte tanpui dan tur Multidimensional Psychological Trauma Assessment and Intervention for Child Sexual Abuse chungchang training, ni khat awh tur chu vawiin khan buatsaih a ni.

National Commission for Protection of Child Rights, Mizoram State Commission for Protection of Child Rights, Mizoram State Child Protection Society leh Social Welfare Department buatsaih training hi Mizoram Police Director General Pu Balaji Srivastava chuan khuallian niin a hmanpui a. Training-ah hian All India Institute of Medical Sciences (AIIMS), New Delhi atangin Psychology Dept Professor Dr Rajesh Sagar leh Child Psychologist Dr Renu Sharma te'n kalkhawm te hnenah thupui thlanbik hmangin zirtirna an pe a . National Commission for Protection of Child Rights, New Delhi atangin NCPCR Member Pi Rupa Kapoor leh Child Psychology & Sociology Senior Technical Expert Pi Shaista Khan te an tel bawk a ni.

Khuallian DGP Pu Balaji Srivastava chuan POCSO Act 2012 hnuaiah Mizoram sawrkar chuan kum 2014 atanga kumin June thla thleng khan thubuai ziahluh 719 a nei a, pawikhawitute dan ang taka hremna a sang hle tih sawiin, Mizoram chu India ram pumah POCSO Act hnuaia conviction rate nei sang ber a ni, a ti a. Naupang laka pawikhawihtuten thiam loh an chan a, dan anga hrem an tawrh ngei theih nan police ten tan an la a, hetiang thil rapthlak tak a thlen hian police te chuan uluk taka chhui leh pawikhawihtute thiam loh chan tir an nih thuai theihna tura hma lak chu an mawhphurhna a ni a, theihtawp chhuah zel an tum thu a sawi a ni