NAUSEN PIANGHLIM ENKAWL DAN

An khawvel hmasa nu chhul chhung lum nuam leh thianghlim tak, faisa pawh nilo ei sa an rinna atanga khawvel thar an rawn chuan chhuah rual hian, an tan nasa takin thil a inthlak danglam a. Pawn lama hmuh theih bakah an taksa chhunglam hnathawh dan leh dinhmun pawh a in thlak danglam nasa hle a ni. An tan chuan he khawvel hi a vawt lutuk a, a ro lutuk a, a eng lutuk a, a bengchheng lutuk a, a bawlhhlawh em em bawk a. An immunity a la puitling lo bawk nen, natna an kai hma em em bawk a ni. Chu an khawvel tharah chuan an dam khawchhuah ngei a ngai si a, chutiang tur chuan an insiamrem ve fe a ngai a, enkawl uluk leh dimdawi pawh an ngai hle bawk. Aw le, Nausen damtha pangai nitina kan enkawl dan tur tlangpui te chu:

1. Body care:

1) Daily bath: Nausen chu an dam that chuan nitina bual tur a ni. Kan bualna hmanrua hi a fai tha tur a ni a, kut pawh fai taka sil hmasak tur a ni. Nau bualtui hi thenkhat chuan kan duh sa hle a, hreawm an tih khawpa tih sat hi a tul lemlo a ni. A lu kan suk dawnin a taksa tuamlum tur a ni a, a benga tui a luh loh nan a beng pahnih kutzungpui leh zungchala hupin, sahbawn hnawih hnuah a lulei vel dim te tea massage tur a ni.
A lu leh hmai vel hi a taksa dang bual hmain hruk hul phawt a tha. A taksa hi sahbawn chulh hnuin dim te tea massage tur, hei hian thisen zam kal vel a ti chaka, a tangkai hle. Bual zawh hian rang taka hrukhula tuam lum nghal tur a ni.

2) Skin care: Nausen pianghlim hian cheese ang deuh var beh hi an kai duh hle a, hei hi chhan awmloin Pathinin a lo siam ngawtlo a, an taksaa natnahrik lut tur lo veng tu leh lum pe tu a ni a, tihfai kher tumloh tur. Bawl sin te te an nei duh hle a, damdawi a ngai vek kherlo a, a nasat viau chuan Doctor rawn a tha. Tin, bawl lian deuh hnai pai 2/3 ai tam an neih chuan Infection a awm palh thei a, entir a tha. Hruk hul that hle tur a ni. Abikin; an kapkar, beng hnung leh nghawng leh zakhnuai te hruk uluk hle tur. Sahriak mawm lutukloa an taksa chulha, massage pah tur a ni. Khawlum laia mawm lutuka hnawih hian a ti hreawm zawk thei a, a tawk hriat ve a ngai.

3) Eye care: Naute pianghlim hian mitek leh mit berh deuh an nei duh hle a, damdawi a ngai vek lemlo a ni. Kut fai taka sil phawt a, lapaw thianghlim Normal salinea tih huhin, a hnar lam atanga a chhuak zawngin hruk tur, vawikhat hrukna hi hmang nawnloin paih zel tur a ni. Kar 2 hnu vel pawha a la reh loh chuan Antibiotic drop hman a tul thei a, Doctor rawn a tha. An mitah hian hnutetui far miahloh tur a ni, nautein a ngeih ang thoin Natna hrikin a ngeih a, kan chawm thau tihna a ni mai. A ti septic hlauh thei zawk a ni.

4) Nose & Ear care: An hnar hi bual zawh hlimah Ear buda dim te tea hawlh fai thin tur a ni. Hritlang hnar phui satliah ah chuan N/S drop hian a ti ziaawm ve thei bawk.

An beng hi tui lutlo turin a bual dan kan sawi a mi ang khian tih tur a ni. A chhung leh bengkawr vel bual zawhah fai taka hruk hul tur. Beng hnung lam hi hmaih palh a awl hle a, tihfai tel thin tur a ni.

5) Cord care: Naute laihrui hi tih ro that hle tur a ni a. Hnute tui emaw thil dang a tha an tih nazawng hnawih loh tur. A tlak hma leh a tlak tirhah bual zawh apiangin lapaw thianghlim leh spiritin hul taka hruk thin tur a ni.

6) Genital care: A bikin hmeichhe naute ah, an serh bawr vela thil var awm thin hi, vawikhata hruk fai vek dawn chuan na an ti ve a, oil a chiah phawtin hruk fai a awlsam. Mipa naute pawh an sazu hmawr chhunglam tih fai tel tur.
An zun leh ekin hul taka hruk thin tur a ni. Hmeichhia ah chuan chunglama hru chho loin, hnuailamah hruk thlak tur a ni.

2. Breast feeding:

1) Hnute tui a chhuah that nghal mai loh pawhin hnek tir tho tur a ni. Nautein hnute an fawh khan, thluakin hnute tui siam a ngai tih a lo hria a, a lo awm ve leh thuai mai thin.

2) Tuilum leh thil dang hnek tir loh tur. A theih hram chuan nu hnutetui nilo thildang Nestrogen leh Nan te pekloh tur a ni.

3) Nu hnute tui chhuak hmasa ah hian naute tana tha bik chaw tha hrang hrang, vitamine leh
natna do theihna te a awm a, hnek tir ngei ngei tur. Nu hnute tui hnelo nautein natna an kai hma bik a ni.

4) Hnute pek laiin nu chu hahdam leh rem taka
awm tur a ni a, naute pawh rem taka pawmin, a lu leh taksa chu ngil takin a awm tur a ni.

5) Naute chuan hnute hmur sir dumlai (areola) thlengin a tam thei ang ber a hmuam tur a ni a, hnute hmur pawhfan tir loh tur.

6) Naute chu a zing thei ang ber leh a duh anga reiin hnute pek thin tur a ni.

7) Hnute lehlam leh lehlam hnek tawn tir chhen loh tur. A hnekna lam kha hnek ruahtir zel tur. Hnute tui a in siam tha bik a ni.

8) Hnute pek laia an mutthluk chuan, an kephah leh biang vel hi dimtein zar i la, an hnek chhunzawm ve leh mai thin.

9) Hnute a hnek zawhin naute chu a bawkkhup zawnga kokia pawm liamin emaw, bana bawhtirin a hnungah ben thek thek tur a ni. Boruak a lem palh tihchhuah nan.

10) Nautein hnute a hnek that theihloh chuan a ka a na emaw, a damlo a ni thei a, ngaihthahloa enti
vat tur a ni.

11) Naute hnute pek dan that tawkloh avangin, nau tleilo, zan tah vei leh harsatna tamtak a awm thei a, chuvangin nu chuan naute hnute pek hi a ngaipawimawhin a uluk hle tur a ni.

3. Clothing and Restrain:

Naute thawmhnaw chu a nem leh deh nuam deuh rawng da lam ni se. Puan na lutuk leh thlan hiptheilo chi chu hmanloh hram a tha. Tin, sahmula siam leh puan me chi nilo bawk se. Kawr hi a phelh leh hak awlsam turin a phel (Frog) ang chia thui ni se, a kilhna pawh taksa do leh nawt theilo chi hman tur a ni.

Naute hian lum an mamawh tam bik hle a, an taksa a lo vawh viau chuan Hypothermia neiin harsatna nasa tak a thleng thei a ni. An kut leh ke tuam lum that tur a ni a, lukhum an lu dip khuh tela khum tir ngei bawk tur a ni. A duh tan chuan Diaper a hman theih a, an zun huha an mut hian an tleiloh phahin, kap lawng vel te a siam hma hle a ni. A thlak hun erawh hriat a tha.

Naute hi tuam beh (restrain) thatloh chuan an phar an phar a, an in phar buai a, an tap leh nge nge thin. Naute ban chu a taksa sira dahin, ngil taka a lu atanga a ke thleng tuam thlak tur a ni. A ke lam hi bilh chhoh a, a hmalam tuamna hi a hnung lamah nghet taka bilh luh leh tur a ni.

4. Emmotional support:

Naute hian duat
leh ngaihven hi an hriain, an thlamuanpui ve em em a, thil engmah hreloa ngaia ngaihthah mailoin nu leh pa chuan kan ngaihven a ni tih lantir fo tur. An tah te hian biaka thlamuan mawlh mawlh tur a ni. Eye to eye contanc pek thin te hi a pawimawh hle bawk. Nautein kan duata kan ngaihven a ni tih an in hriat hian an rilru leh taksa thanchhohna ah awmzia a nei thui hle a ni.

5. Sleeping:

Naute hi nikhatah darkar 20 vel zet mut mamawh an ni a, an mutthat hi ngaihpawimawh hle tur a ni. An mut thatloh chuan an tleilo duh bik a, nau tapbelh kan tih te hi mut an hmuh thatloh vang a lo ni fo thin. An mut that theih nan thawm dim a, eng lutuk te en that a, tuam lum that a, an zun huh leh ek te thlak zung zung tur a ni.

6. Immunization:

An pian tirha vaccine an lak bak ah hian thla khat leh achanve atangin lak tan leh tur a ni a, thla khat dan zelah vawi thum lak tur a ni a, a bak chu a khat ve deuh tawh ang. Heng an vaccine lak zingah hian Khawsik thlen thei chi a awm a, nachhawkna dose dik leh hunbi diktak ah pek tur a ni. Vaccine an lak kim vek hi an Rights a ni a, an na tuar tur khawngaih vanga lak tirlo mailoin lak kim tir vek tur a ni.

Naute hi an damloh leh harsatna dang an neih vang tihloh ah chuan, mamawh an neihin an tap tlangpui a, an tah chuan hengte hi ngaihven thuai tur a ni. A zun leh ek thlak a ngai em, vawt a ti em, hnute a kham em, tih leh mut a hmu tha em tihte hi ngaihven zung zung a, duat taka enkawl tur a ni.