Mamit-ah DC duh lohna kawngzawh; a tawp thleng thlen an tum

September 5, 2018 khan All NGOs leh All Political Party, Mamit huaihawtin Mamitah Mamit district Bawrhsap Bhupesh Chaudhury duh loh lantir nan kawng an zawh a, Central YMA President Vanlalruata pawhin a telpui a. Hun an hmannaah thu sawitute chuan an duh hi a hlawhtlin hma chuan kal zel an tum thu an sawi hlawm.

Kawngzawh hi Charkawn atanga DC Complex thlenga neih niin, Charkawnah hian K.Lalthanzama, Vice President, Sub-Headquarters YMA kaihhruaiin hun tawi hman a ni a, DC chu vai a nih vang emaw, hnam dang a nih vang ringawta duh lo an nih loh thu a sawi.
J.Hrangdailova, Joint VC Chairman pawhin thu sawiin, “District kan nih hnuah DC 13 kan neihna a ni a, hetiang DC hi kan la nei ngai lo,” tiin, “ A enkawl mipuite mamawh leh harsatna pawh ngaithla duh lo hi rang taka a chhuah hi kan duh,” a ti.

Thusawitu dang, Lalthlengliana, Mamit MNF Block President leh MSU General Hqrs atanga thusawitute pawhin, mahni office pawh humhim zo lo DC, Mizo kan nihna humhalh thintu NGO hruaitute man tumtu hi sorkarin a rang thei ang berin sawn chhuak se an duh thu an sawi.
Kawngzawh kharna hi DC Complex-ah K.Elly Rosanga, President, Sub-Headquarters YMA kaihhruaiin neih a ni a. Thusawitu P.C.Lalthanzuala President, Mamit Central Block Congress chuan, “Ram leh hnam tana kan thawhchhuahna hi a thlawn lo vang tih kan ring,” a ti a. “ Mamit khua mipuite hi kan sual lo va, sorkar hnathawk kan hek ngai lo, district kum 20 kan nih kuma kan DC hian NGO, political party bakah amah dawr thintu mipuite min lo dawr dan hi kan duh lo va, kum 20 chhungin hetiang DC, Mizote min hmusittu kan neih vawi khatna a ni,” tiin Mamit atanga chhuak tura an tihna hi a hlawhtlinna an hmuh hma chuan an kal zel dawn tih a sawi.

Vanlalruata, President, Central YMA chuan Mizote tanrualna hun ropui tak an tawng a, a lo tul hle a ni tih pawh an hriat thu sawiin, “Kan hlawhtlin hma chuan kan bei zel ang,” a ti a. “Mizote chu Tribal, a bika enkawl ngai kan nih tehlul nen, chutiang hre duh lo vai chapo DC kan nei hi a lungchhiatthlak a, Mizote min hmusit a, enkawl kan ngaihna a haider tlat hi hriatthiam a har a, kan sorkar pawhin hma la rawh se,” a ti.

Central YMA President chuan, “Inthlanpui muanawm tak leh thianghlim tak a awm theih nan All NGO chuan theihtawpin hma kan la a, election kaihhnawih pawh Mizoram chhungah ngei khawih ni rawh se kan tih lawm lawm laia Bhupesh Chaudhury-an a ruka Tripura-a zuk nei lui talh hi na kan ti a ni,” a ti bawk.

Lalthianghlima, MZP General Headquarters Asst. Secretary pawhin thusawiin, “MZP General Headquarters chuan he vaipa DC chungchanga a ngaihdan chu, ‘ Mizoramah a awm tawh tur a ni lo’ tih hi a ni,” a ti a. “Zophai buaina avangin vaiin min hliam a, thisen a chhuak tawh a, chutih hnuah he vaipa hian Tuikuk hmaah Mizote min dah hniam a tum hi kan duh lo. Electoral Roll-a chuang lo Tuikuk eng emaw zat dan lovin roll-ah thun a tum niah kan ngai,” a ti bawk.

K.Lalthangmawia, President, Mamit District chuan Mizoramah hnam hrang hrang kan khawsa tih a taka tichiangtu chu Mamit District a ni a ti a. Tuikuk anmahni thua chhukthla, koh lawm lawm pawha lo haw duh lote Tripura Camp-a Roll Revision neih hi tlawm thlak kan ti a, chutihlaiin kan DC hian a ruk a ralin a lo zuk tihtir a, hetianga Mizote min hmusittu hi eng ang officer lian pawh nise kan mamawh lo. Roll Revision bo chungchangah a tuar tur ber District Election Officer man ala ni lo chu mak a tih thu a sawi bawk.
He hunah hian Micky C.Lalfakzuala, President, Mamit District Village Council pawhin thu sawiin, “Mamit district min timualphotu DC kan nei hi a pawi a, a rang thei ang berin a puanthuah tel sela, haw vat se kan ti,” a ti a. He hun kaihruaitu K.Elly Rosanga pawhin Bhupesh Chaudhury hnenah, “Mamit leh Mizote hmusittu, Mamit district-in kan mamawh lo che a, rang takin i inah min hawsan rawh,” tiin a hrilh bawk.

Kawngzawha kalkhawmte hian a hnuaia mi ang hian resolution an pass:
1. Mizoram sorkar leh All NGO, Mizoram te duh dan kalha Tripura-a awm Tuikukte Electoral Roll-a a ruka thun luih a tum hi kan duh lo.
2. Mizoram MLA General Election-2018 lo awm turah hian Mizoram pawnah Tuikuk ten engtikawng mahin vote an thlak kan remti lo.
3. Mizo mipuite leh tlawmngai pawlte hmusit leh diriam taka tawng khuma, mana vau thintu DC hi kan duh lo.
4. Pu Bhupesh Chaudhury IAS, Deputy Commissioner, Mamit kaihhruaina hnuaiah MLA Eclection thianghlim leh felfai a awm kan ring lo.
5. Pu Bhupesh Chaudhury, IAS, Mamit DC hi sorkarin September 20, 2018 hma ngeiin Mamit atangin sawn chhuak rawh se.