11th September, 2018 (MSR) : Mizoram sorkar hmalakna ngaichangin MZP in ramri humhalh chungchanga kawngzawh an tum chu an chawlhsan lailawk rih.
Nimin khan MZP chuan Executive meeting neiin an President L.Ramdinliana Renthlei chuan a kaihruai a, 'Assam leh Mizoram ramri chungchangah hmalakna a awm loh chuan Ramri humhalh kawngzawh 12th September, 2018-ah neih nise' tia committee in a lo rel tawh chu, ngun takin an ngaihtuah a. September ni 7-a MZP hruaitute leh Chief Minister ten an sawiho hnuah Chief Minister-in chak takin hma a la nghal a, Ramri chungchang ngaihtuahtu tur Core Committee thar hlak siamin, a rang lama Sorkar laipui nen inbiak a, a theih anga chaka bawhzui sorkarin a tum thu tarlan a ni a. "He tia Assam leh Mizoram ramri buai chungchanga sorkarin hma la a, a bawhzui tur Core Committee thar hlak siam a nih dawn tak avangin, tun dinhmunah chuan kawngzawh tum hi chawlh lailawk rih ni se" tiin MZP committee chuan a rel a ni. Sorkarin a intiam anga MZP duh dana hma a la lo a nih erawh chuan a tul angin MZP chuan hma la chhunzawm turin an inkau reng tih an tarlang.
MZP chuan Mizoram Private School hrang hrang Monthly fee sang lutuk chungchang chu ngaihtuahin uchuak taka fee tisang an awm niin MZP chuan a hria a, Sorkar in fee chungchangah Notification a chhuah anga Private School ten fee siam turin Private School thuneitute chu a ngen a, dan zawmtur Sorkar-in a siam anga kalpui a nih theih nan MZP chuan a theih angin hma lak a tum bawk a ni.
No comments:
Post a Comment
COMMENT RAWH