From- LUNGLEN SPORTS
Spanish La Liga hotute chuan tun season chhunga United States-a inkhel buatsaih turin hma an la mek a, home team tantu mipui tan kal man leh thlenna man a ngaihtuahsak dawn.
Tunhnai maiah La Liga leh American media company Relevent-in kum 15 daih inremna an ziak a, United States-a La Liga inkhel buatsaih turin thuthlung an siam tel nghal.
Tun season-ah hian a vawi khat nan US-in Spanish top flight football inkhel pakhat a thleng dawn a, kum thar January-ah Girona-in Barcelona an mikhual dawn a, hei hi Miami-ah an khel dawn niin an tar lang.
La Liga ruahmanna hi Spanish FA leh Spanish Footballers’ Union chuan duh lovin an sawisel a, chuti chungin La Liga-in kaltlangpui ngei a tum a ni.
Engtiang chiahin nge ruahmanna an siam tih puanzar la ni lo mah se US-a inkhel tur team pahnih zinga home team season ticket neitute tan hamthatna siamsak a ni dawn niin an tar lang.
BBC Sports chuan home team season ticket neitute zinga US-a inkhel en turte zinna leh thlenna man tlawm zawka tihsak an ni dawn a, season ticket nei si en thei lote erawh zangnadawmna pek an ni ang.
Catalan chanchinbu Sport-in a ziah dan chuan home team season ticket neitu mi 1,500-te a thlawnin an thlawk thei dawn a, an ei leh in man pawh ngaihtuahsak an ni ang.
La Liga lam chuan a hun leh hmun tur leh tute club nge inkhel tur tihchian a la awm lo va, a tha thei ang bera kalpui a nih theih nan thil hrang hrang ngaihtuah mek a ni, an ti.
No comments:
Post a Comment
COMMENT RAWH