Denmark player thate leh Denmark rama football thuneitu sang ber Dansk Boldspil-Union (DBU) te sum (commercial rights) chungchanga an inhmuhthiam lohna chuan nghawng tha lo zawk neih chhunzawm zelin inphahhniam duh an awm loh avangin buaina a la kiang thei tak tak lo.
Danish league sang ber Danish Superliga leh a dawttua khel te mai bakah ram hrang hranga khel an player te chu ram tana an khelha an pawisa dawn leh hamthatna dang chungchanga Dansk Boldspil-Union nena an inrem theih loh avangin heng player thate hi ram tan an inlan duh lo va, Denmark Football Association mangang chuan an team-ah hian Dawr nghak thin, zirlai leh Internet lama games khel thinte a telh nawk mai.
Denmark hi September 5 leh 9 hian friendly match-a Slovakia leh Wales hmachhawn tur an ni a, an khelh loh chuan pawisa chawi bakah kum 4 chhung UEFA buatsaih tournament khel thei lo tura hrem an nih theih dawn avangin an player pangngai zawkte tel lovin nawi takin Nilaini khan Slovakia an hmachhawn a, 3-0 in an tlawm.
Denmark tlar hmaa ding Christian Offenberg chu Danish Third Division club, Avarta-a khel, dawr nghah paha inkhel thin a ni a, right-back Simon Vollesen chu Danish fifth division club player lehkha zirlai niin an midfielder Rasmus Johansson pawh third division club a khel, games khelh lama a lar zawk avanga ‘internet freestyle footballer’ tia an hriat Instagram leh YouTube lama thlirtu ngah tak a ni daih!
Liverpool defender hlui Martin Skrtel leh Napoli playmaker Marek Hamsik te awmna Slovakia hi Denmark team phuahchawp hian an ngam lo hle a, 27% chiah ball changoin minute 90 chhungin goal zawnah vawikhat chiah an pet a ni.
Hei mai hi a la ni lo va, Danish team-ah hian Futsal player 5 lai telin an goalkeeper Christoffer Haagh pawh hi professional futsal goalkeeper niin goal zawna Slovakia player te pet 10 zinga 7 zet chu a lo dang a ni.
Dansk Boldspil-Union chief executive officer Claus Bretton-Meyer chuan an dinhmun chu a tha lo tak zet tih sawiin Tottenham midfielder Christian Eriksen chuan an contract hlui anga inremna neih a, an buaina chinfel vat a duh thu a sawi bawk a ni.
October 2017 khan Denmark women's team leh an ram football thuneitu snag ber Dansk Boldspil-Union te hi hlawh chungchangah lo intibuai tawhin hmeichhe team hian Sweden nena World Cup qualifier an khelh tur chu an khel duh lo va, hemi tum hian Denmaek Football Association hi £18,000 chawitir niin an khingpuite hi 3-0 a chaka puan an ni bawk a, an khel zui duh lo a nih chuan kum 4 chhung Uefa hnuaia inlan thei lo tura hremah vau niin Denmark FA chuan an player lungawi lote hi inremna an neihpui ta thuai a ni.
Pathiannia Wales an hmachhawn hunah pawh Denmark manager Age Hareide leh assistant Jon Dahl Tomasson te chuan an team an enkawl dawn lo va, Euro 92 champion zinga mi John Jensen chuan a kaihruai lailawk ang.
Author :
Lawmkima Hmar
No comments:
Post a Comment
COMMENT RAWH