NLUP sem chhunzawm dawn

NLUP a ngai anga chhunzawm turin line department-te hriattir an ni tawh - NIB

NLUP Implementing Board (NIB) chuan thuchhuah siamin, NLUP line department tinte chu NLUP a ngai anga kalpui chhunzawm tura hriattir an nih tawh thu an tarlang.

NIB chuan, NLUP beneficiary 16,400 thlan tawhte Gauhati High Court order vanga kalpui theih loh anga sawi an awm nia sawiin, "Court-in August 3, 2018-a order a siamah khan ‘stay order’ a awm lo. High Court hian NLUP sem hmain guideline felfai tak hnuaiah langtlang taka thil tih leh account fel taka vawn tur tih erawh a inziak a ni," an ti.

NIB tarlan danin, NLUP hmalakna chu langtlang taka kalpui tura Chief Minister duh danin a bul ṭan a nih dawnah NLUP Manual leh Guideline hmasa June 1, 2010-ah NLUP Nodal department, Agriculture department-in notification a lo chhuah tawh a; chumi hmang chuan September 2017 thleng NLUP kalpui a ni.

Kum 2016-17 aṭangin NLUP-NEDP Convergence Scheme chu state flagship anga NLUP chhunzawm nan sorkarin ruahmanna a siam a, felfai taka kalpui turin NIB-in guideline thar duangin, October 5, 2017-ah a notification chhuah a, NLUP guideline thar chu department leh implementing agency pawimawhte hnenah pek a ni.

High Court duh danin, NIB Notification aiah NNCS hnuaia NLUP kalpui dan tur guideline pawh Cabinet thutlukna dungzuiin Agriculture department chuan August 10, 2018-ah notification a chhuah a, chu chu Mizoram Gazette Vol. XLVII, dated 27.8.2018-ah chhuah (published) a ni.

PIL hmanga High Court-ah petition thehluh a nih hmain NLUP Guideline leh a kalphung engkim ruahhmanna felfai ṭha tak siamfel sa vek chu hman a ni a, NLUP guideline dungzuiin beneficiary thlan zawng zawngte chu Village Level NLUP Committee (VLNC) kaltlanga thlan vek an niin NIB chuan an tarlang.

Beneficiary 16,400-te chu VLNC kaltlangin endik an ni a, VLNC-te'n an district-a DC ṭheuhte hnena an thehlut niin an tarlang a; DC kaltlanga NIB-in a lo hmuhte chu pawmpui niin, NLUP line department tin hnenah NLUP kalpui nghal tura hriattir an ni tawh niin an tarlang bawk.

Source- Vanglaini