Vawi 100 bawr vel chu kha video kha ka ennawn tawh - Trippier

England leh Tottenham Hotspur wingback Kieran Trippier chuan World Cup semi final-a Croatia laka a freekick-goal kha tum 100 bawr vel zet a ennawn tawh thu a sawi.

"Zep lovah chuan kha goal kha tum 100 vel zet chu ka ennawn tawh. Kan chak ta lo khan min tina viau nain ka ennawn zing hle. Croatia nena kan game chauh ni lo, game dangte pawh ka en nual a, semi final-a chakloh chu a hrehawm duh hle. Mahse, team anga kan thawhhona leh thlen chinah erawh ka chhuang hle," tiin Trippier chuan a sawi.

Trippier hi club lama a kir leh hnuah pawh freekick pettu a ni zui a, Christian Eriksen-a chanpual nia ngaih thin setpiece taker nihna pawh tunah chuan an pahnih chanpual a ni chho ta a, Fulham laka a freekick goal chungchang pawh sawiin -

"Kan game hnuhnungah te a tul dan azirin kan inpet chhawk a, lehlam tana hlauhawm thei ang bera pet turin, chumi dinhmun azir chuan kan pet mai thin.

Tin, a hunlaia inrintawkna kan neih dan azir te pawh a ni thin. Tute pawn Christian Eriksen ball petthiamzia an hria; Fulham lakah erawh kha chuan ka inrintawk em avangin, 'pet ta ila pawi i ti em?' ka ti a, ani'n a lo remti a, ka petlut ta rêng a ni," tiin Trippier chuan a sawi bawk.