Rinna avânga khawngaihnaa chhandam in ni, nangmahni thawh chhuah a ni lo va, Pathian thilpêk a ni. Thiltih avâng a ni lo ve, chutilochuan, miin an chhuang dah ang e (Eph.2:8,9).
Dr Charles Frazier Stanley-a chuan, "Rinna avânga khawngaihnaa chhandam in ni, nangmahni thawh chhuah a ni lo va, Pathian thilpêk a ni, thiltih avâng a ni lo ve," tih thu hi a man fuh lutuk a. A zirtirnaah chuan, "Mi tupawhin khawngaihnaa thilpêk chhandamna hi a chan tawh chuan a sualna zaa za chu ngaihdam a ni tawh a, a hnu zela a sual pawh ngaihdam sak sa tawh a ni, a chhandamna chu a bo leh thei tawh lo a ni," a ti hmiah mai a. "Chhandamna chu keimahni thawh chhuah a ni lo va, kan thiltih that avânga kan chan pawh a ni hek lo va. Pathian khawngaihna avânga rinnaa kan chan a ni zâwk a, chuvângin, miin chhandamna a chan tawh chuan, dâwt sawi, mi bum, rûk rûk, pawngsual, uirê, tual thah, zu ruih, inngaih, rinawm lohna leh sual chi hrang hrang tih avâng ngawtin a chhandamna a bo thei tawh lo," a ti hmiah. A zirtirnaah chuan piangthar tawh kan nih chuan, khing sualte khi ti țhin mah ila chhandam kan ni tho dawn tihna a ni.
Dr Stanley-a pawm dan ang hi Mizo Kristiante pawm nuam tih zâwng tak a ni a. Mahse, khawngaihnaa chhandam kan nih sawi fiah nâna, pian thar tawh hnua kan rinna tar langtu tûr ber, nun dan dik te, nun dan fel te, thil tha tih te paih khera kan sawifiah thin hi chu thil pawi tak bul chu a ni tlat si. Hei vang hi a lawm, piangthar tawhte pawhin thil sual tih kan hreh teh chiam lohna chhan chu. Piangthar tawh chu kan inti deuh vek bawk sia, chutichung chuan thil sual tih hi kan pawisa teh chiam ta lo a ni ber mai.
Chuvângin, Kan chhandamna thu sawi dân tam ber hi chu, sual eichhiat tawh, dam rei tawh lo tur, thi mai tur tân a țha țhin khawp mai. Mahse, mi hrisel, la dam zêl tûr tân erawh chuan sual pawisak lohnaa min hruai luttu țha tak a ni thei zawk maha. Sual ti zel chung pawha mahni inthiam chawp nân a țha ve tlat si a. Speaker thenkhat lah chuan, Rinnaa chhandamna kan chan hnua kan nun chhuahpui tur, felna te, dikna te, țhatna te, inpêkna te chu min simtir an lo tum phêt bawk nen. Mizoram hi zawng, a thlâwna chhandamna kan chiang leh lutuk hi kan chian loh phah ta zâwk a nih hi.
Keini erawh hi chuan, kan thawh chhuah ni lo, kan thiltih vâng pawh ni lo, rinna avânga khawngaihnaa chhandam kan nih hnuah hi chuan, sual laka chhandam mêk leh chatuan atana chhandam tûr kan nih zel theih nan kan Lalpa tan hian sual kalsanin thil tha i ti zel ang u.
Ngaihtuah zui atan
* Mi țhenkhatin, "Piangthar tawhte chuan thil sual an ti thei tawh lo," an tih hi a theory chuan a dik hmel fu mai, a practicalin kan nunah a dik zel thei em ?
* Nge, pianthar tawh hnua thil sual tih hi Lalpan sualah a ngai tawh lo zawk ?
No comments:
Post a Comment
COMMENT RAWH