Thailand puka mi chhanchhuahte film siam dawn

Universal Pictures chuan kumin July thlaa Thailand ram puka school naupang chhanchhuah a nih dan behchhanin film siam an tum niin Deadline Hollywood chuan an tarlang.

Check

Thailand ram pukah hian school football team naupang 12 leh an coach-te chu an tang a, him dam takin chhanchhuah vek an ni a. He thil thleng hian khawvel a deng chhuak a, film siamtute chuan film ropui tak siam theih inring-in, film siam an tum thu an puang sup sup a. Universal Pictures hi Thailand chhanchhuahna behchhana film siam tuma insawi pasarihna an ni tawh a ni.

Universal Pictures chuan Wild Boar football team-a an coach Ekkapol Chantawong, Richard Harris leh Craig Challen-te chu an nun behchhana film siam phalna an nei fel tawh a. He film hi Michael De Luca leh Dana Brunetti-te chuan an produce dawna ni.

De Luca leh Brunetti-te hi The Social Network (2010), Fifty Shades of Grey franchise leh Captain Philips (2013)-ah te an lo thawk dun tawh a. Thailand chhan-chhuahnaa diver-te inpekna leh an tha thawh chuan an rilru a khawih thu leh an hma lakna behchhana film siam chu an phur tawh thu an sawi.

June ni 23-a puka lut, July ni 10-a chhanchhuah chauhte behchhana film siam tum zingah hian Jon M Chu leh Ivanhoe Pictures, DeWarrenne Productions-te pawh an tel a ni.