SAP HMING HI

⁠—Rempuia Ralte Lûtmâng ka ni ka pu

Mizo zingah hnam dang hming pu kan tam tih chu tlang hriat a ni a. Hnam dang hming pu rau rauah Sap hming pu kan ṭhahnem berin ka ring a, chu vang chuan, sap hming chauh sawi mai i la. Kristian hming kan tihte pawh hi 'Sap version' a nih deuh zel tho avangin 'Sap hming' tih hian a huam tel vek thoin ka hria.

Mizo chuan a tlangpui thuin hming pum lawng lawnga inkoh hi a chaltlai deuha kan hriat vang te pawh a ni ang, inkoh dan bik kan nei fir fer ṭhin. Lalrinawma chu Rinte, Marin tih tein kan ko a, an hming tel miah lo - Mapui, Mami, Tete, tih te pawhin kan ko ṭhin.

Hetiang deuh bawk hian Sapho (hnam dang pawh an ni ve tho ang) pawhin inkoh duat an lo uar ve tho mai. Ṭhenkhat chu an hming tak ni lo, mi dangina an koh duatna hming hmanga lar ta daih te pawh tam tak an awm. .

Mizo zingah pawh Lalruathlui chu Hlutei tia a lar ta daih ang hian khawthlang ramah pawh Mike Tyson tih te, Tom Cruise tih te, Kenny Rogers tih tein an lar chhuak a; Mike Tyson hming tak chu Michael Gerard Tyson a ni a, Tom Cruise hming tak pawh Thomas Cruise Mapother IV tih a ni deuh duah a, Kenny Rogers hming tak chu Kenneth Donald Rogers a ni.

Lalruathlui hming tak chu Hlutei a ni ngai lo a, a certificate leh ID zawng zawngah pawh ‘Hlutei’ tih a chuang kher lo mai thei. Chutiang bawk chuan, Mike-a leh Tom-a te hian an official certificate iloah "Mike Tyson" tih leh "Tom Cruise" tih an ziah tir ngai lo ang tih a rinawm.

Sapho chu an lar si, an ṭawng lah hnam dangte inbiakpawhna ber a ni tawh bawk si a. An ṭawngte leh an hmingte hi mawi kan ti a, an hming ang chu kan fate hming atan kan awt a, kan sa ve ta zel a. Hetah tak hian, kan fate hming kan saksak dan hi a fuh chiah em tih ngaihtuah a ngai.

An hming pangngai ang kan sa a nih chuan, kan sa duh miau mai si a, a fuh viau zel turah ngai ta ila. A nih leh, an hming tak ni lo, an inkoh duatna hming hi lo sa ve ta ngawt i la a fuh chiah ang em. Hlutei ngaihsan luat vangin hnam dangin an fanu hming tak takah ‘Hlutei’ sa ve ta ngawt se, "A dik lo/ a ni thei lo," kan va tihsak ngawt thei lo ang. An sa ve duh a, an sa a ni ve mai a ni. Mahse, a nuihzatthlak deuh mai thei. Chutiang bawk chuan, kan fate Sap hmingah Sapho inkoh duatna hi lo sa ve ta ila, ‘Hlutei’ hming la chhawng ang chauh kan ni ve thei mai thei.

Johhny tih hi inkoh duatna a ni a, Sapho zinga Johnny-a reng reng hi chu an hming tak John a ni deuh zel ang. Eddy/Eddie hming tak chu Edward tih emaw, Edmond tih emaw a ni daih thei. Andy pawh Andrew/Andrea an ni ṭhin. Chutiang zelin Bobby tih chu Robert a ni ang a, Ricky tih chu Richard emaw Frederick emaw a ni leh ang a, Frederick hi Freddie tiin a koh duat theih bawk. Danny tih chu Daniel an ni deuh zel ang. Mimi tih hi Maria emaw Mariah emaw koh duatna a ni. Steve tih chu Steven/Stephen a ni ang (Steven leh Stephen hi hming thuhmun, lam rik dan thuhmun a ni). Kenny tih pawh Kenneth an ni tur a ni. Jim/Jimmy chu James koh duatna, Mick/Mike/Micky/Mickey hming tak chu Michael, Debby/Debbie chu Deborah, Tom/Tommy chu Thomas, Jenny chu Jennifer, Nick/Nicky chu Nicholas an ni thin. Amelia/Amanda tih hi Amy a tih theih ve ve a, Juliet/Julia hi Julie a tih theih a, Judith hi Judy, Ann/Anna hi Annie tiin an koh bawk. Henry/Harold chu Harry tiin a koh theih a, Cynthia/Lucinda/Cinderella koh duatna chu Cindy a ni. Christy tih hming tak chu Chistina, Christine, Christian, Christopher, Christabel te a nih hmel.

Ka hre kim lo a, ka hriat chin pawh sawi sen a ni chuang si lo. Mahni ṭheuh lo inen mai ila a ṭha ang e.

Inkoh duatna ka sawi tam tak khi hming tak taka hmang kan awm nual mai thei. A pawina a awm kher lo ang. Hming satu berin kan hming atan a sa a, kan hming a lo ni ta mai a ni. Kan hming a nih miau avangin kan hming tak tak a ni ta mai tihna a ni. Mahse, nakin zel atan ngaihtuah chiang ila, a ṭawng neitute'n hming tak taka an hman ngai loh kha kan fate hming tak tak atan kan lo sa ve mai mai thei a. Hnam dang hming ka sa dawn a nih pawhin a awmzia leh a nihna chian hmasa ṭhin i la a ṭhat ka ring.

Sap hming hi khawvel pumpuiah hian a lar vet vet khawp mai a, inkoh duatna kan sawi ang chi khi keini chauh ni lo, hnam dang, ram danga mi tu tute emaw chuan, hming taka ‘Hlutei’ lo hmang ta se, kan tih ang deuh khan, lo hming tak put hmiah hmiah an awm ve ṭeuh thei tho a nia. Keini chauh kan ni bik lo tawp ang.

Ka Sap hming hi "Rempuia" a nia, Vai hian an lam dik thei lo a, a nuam ṭhin khawp mai. Ka fate Sap hmingah pawh Mizo hming chauh ka hmang.

Rempuia Ralte