US President Trump-an Syria hmar chhaka ISIS dotu American sipai 1,000 awmte koh kir a, Turkish sipaite thununna hnuaia dah a tumna chuan ngaihdan a tiphir hle. Syrian Democratic Front (SDF) sipai, Kurdish hnamte kaihhruai thupuangtu Musta Bali chuan, "Syria atanga US-in a sipaite la chhuak a, Tukey thununna hnuaia dah a tumna chu mahni thawhpui (allies) leh thian tha te phatsanna (betrayal) a ni" tiin, Turkish sipaite leh Kurdish fighters te inkarah buaina (conflict) nasa tak a siam anga, Kurds hnamte thah puk pukna (genocide, massacre) a thlen tir ang" a ti. US chu SDF te chuan Turkey-in a thah chiam phalah an puh a ni.
Turkey chuan Kurdish fighters te hi terrorist a ti a, US erawhin kum 5 chhunga Syria leh Iraq rama ISIS tuk tlawm tura a beihnaah, Kurds hnamte hi a thawhpui rinawm leh tha berte an ni. Kurds fighters te hi Turkish hian beih a duh a, chuvangin "Safe Zone" siamin, ralthuam tung turin emaw, mipui nunaute nen indona hmuna awm lova him taka refugee maktaduai 3.6 awmten Syria an kir lehna hmun (safe zone) siam sak a duh.
Turkey chuan Syria ram chhunga Kurdish ho awm chu an lo chak zual zel anga, nakinah Turkey leh Iraq ram chhunga Kurdish awmte nen tangrual zelin, Independence an sual an hlau thawng a ni. Kurds hnamte hi Mizote ang maia thendarh a awpbeh an ni. Mizo te pawh a then India, Myanmar leh Bangladesh ramah awm darh ang deuh, Kurds hnamte hi Syria, Turkey leh Iraq ah maktaduai tam tak awmin, thendarh an ni.
Lina Khatib, Middle East & North America Region Monitor hruaitu, Chatham House, London chuan, "President Trump-an Syria atanga US sipaite koh kir a tum hian, ISIS hote intuai tharna (resurgent) a thlen tir thei ang" a ti.
President Trump erawh chuan, "ISIS hote chu tuk tlawm tawh an ni a, an Lalram (Caliphate) chu 100% in hneh tawh a ni" , a ti thung.
GOP (Republican) leh Democrat hote chuan, President Trump thiltih dan chuan, Kurds hnamte suatna (massacre) a siam thei, tiin White House chu a thutlukna ennawn turin an phut.
Rep. Reuben Gallego of Arizona Democrat chuan, "Kurd hoten America chu an ring leh ngai tawh lovang" a ti. Gallego hi Iraq War-ah raldomi sipaia tel kha a ni.
Nikki Haley, US Ambassador to UN hlui chuan, President Trump-a thutlukna siam chu fimkhur hle tura a duhthu sawiin, "Kan thawhpui tha berte zinga mi thi tura kalsan chu thiltih sual lian tak (big mistake) a ni. Kan thawhpuite min thlawpna chu kan beisei tur a ni a, chutiangin kan thawhpuite pawhin kan thlawp an beisei a ni. Turkey chu kan thawhpui thian tha a ni lo" a ti.
Ilan Golberg, Middle East Security Program at the Center for New American Security chuan, "Syria atanga US inthiar chhuahna chuan ISIS ho a lo kir tir anga, ISIS kai thawhlehna leh Turkey-in Kurd hnam a runna (invasion) remchang tur a siamna a ni a, a ram bial (region) tan chanchin thalo tak a ni" a ti.
Pentagon lam chuan White House chu SDF te thlau thla lo turin a lo ngen tawh a. Nikum Dec thla khan President Trump chuan US sipai 2000 zet lak chhuah a tum vangin, US Defense Secy Jim Mattis leh Trump-a Special Envoy to Anti-ISIS Coalition Brett McGurgh ten Trump Admin an lo chhuahsan phah hial tawh a ni.
President Trump chuan, Sunday a thutlukna a siam chu "dik" tiin a tan tlat thung a, "US atanga mel 7,000 chuanga hla chu Turkey, Europe, Syria leh Iran hoten an enkawl tur a ni. Hetianga Indona tawp theilo hmun atangin kan puanthuah tel a, intho chhuah kan ngai. Indote chu tribals ho an ni a, kan sipaite kan koh let hun a ni" a ti.
MAHSE,
Sen. Mitch McConnell, Republican of Kentucky leh US Senate Majority leader chuan, "Syria atanga US sipaite lak chhuah chuan Russia, Iran leh Assada sorkar chiahin hlawkna an tel ang. He thil hi thawhpuite phatsanna leh chhiat vekna tur leh tihsual (disaster, betrayal, mistake) a ni. Chuvangin President Trump chu a thutlukna siam ennawn turin ka phut a ni" a ti.
Sen. Mitch McConnell, Republican of Kentucky leh US Senate Majority leader chuan, "Syria atanga US sipaite lak chhuah chuan Russia, Iran leh Assada sorkar chiahin hlawkna an tel ang. He thil hi thawhpuite phatsanna leh chhiat vekna tur leh tihsual (disaster, betrayal, mistake) a ni. Chuvangin President Trump chu a thutlukna siam ennawn turin ka phut a ni" a ti.
Sen. Lindsey Graham, Republican of North Carolina pawhin, "Thutlukna diklo a ni. ISIS ho lo kirleh theihna kawng hawnna a ni. President chuan danglam hreh tak (Radical Islam) do chu a chauh phah a ni thei e, mahse, anni chu min do a bei turin an hah ve hauhlo a ni. Trump-an Secy of State Pompeo a hrilh dan kimchang chu ka hre lova. Press report atanga ka lo hriat danin, thutlukna dik tawklo a ni" a ti. Lindsey Graham hi Trump supporter ruh tak a ni.
Sen. Ted Cruz, Republican of Texas pawhin, "Turkish hoten Kurds hnam an beih theihna tur chu a diklo a ni" a ti. Sen. Marco Rubio, Republican of Florida pawhin, "Syria chungchangah report a dik a nih chuan, Trump Admin thiltih sual lian tak (great mistake) a ni e" a ti.
Sen. Sussan Collins, Republican of Maine pawhin, NBC News hrilhin, "Thutlukna finglo nasa tak" (terrible unwise) a tihsak. Mike Huckabee, Arkansas Governor hlui pawhin, "Kan thian tha leh thawhpui hlui Kurds hote kalsan chu tihsual lian (HUGE mistake) a ni e" a ti.
President Trump chuan Reporters te zawhna chhangin, amah thlawp thintute McConnell, Graham, Haley, etc ngaihdan chu zahawm tiin, "An ngaihdan a a zahawm hle. Ngaihdan an nei a. Mi tam takin ka ngaihdan chu an thlawp a ni. Ngaihdan pahnih awm chu ka hrethiam ve ve e. Indona tawp theilo a ni a, ka ngaihdan chuan thudik kan ti mek a ni" a ti.
No comments:
Post a Comment
COMMENT RAWH