Kum 40 chhungin ball 1,000 vel a lum bo tawh
Tlangram hmun sang taka awm a ni a, thlasik lai chuan vurin a bawh nasat avangin vur tleng nan an hmang ṭhin. Tlawh pawh mai theih a ni lo va, hrui hmanga khai car chiahin a tlawh thei a, mihring kal pawhna tur kawng dang takngial pawh a awm lo.
Swiss Alps tlang panga awm a ni a, tuipui zawl aṭangin metre 2000 vela sang niin an sawi. Europe-a football stadium sang ber niin an chhal a, hei hi an inchhuahna tak pawh a ni.
FC Gspon khelmual hi Ottmar Hitzfeld Stadium tiin a hming an phuah a, he club-a kum 18 chhung khel tawh defender Diego Abgottspon chuan : "Football khelhnaah chuan a mawi ber. Tlang leh a panga vurin lawlh bakah thing tam tak i hmu ang," a ti.
FC Gspon hi amateur team a ni a, Swiss Mountain League khelin an stadium danglam tak hi an chhuang hle. Swiss thingtlang khua Gspon-ah hian mihring 585 an cheng a, thing in phui ṭha tak 70 vel a ding.
An khua hi eng kawngpui mahin a pawh lo va, an khaw chungah hrui hmangin car-a kal pawh theih a ni thung. Mahse, he khaw tê tak tê, leilung mawina lama hausa tak hian 1691 khan biak in changtlung tak St. Anna Chapel an sa daih tawh.
A hmun a san em avangin boruak hip tur a tam tawk lo va, football khelmual dang nen a inan lohna chu an chhawr niin Abgottspon chuan a sawi. Ani hi an club player langsar tak ni mah se eizawnna bera a hman chu vur tleng zirtirtu aṭanga thil zuara a inlet a ni.
"Mikhual team tan khelh a harsa em em ṭhin a, first half-ah si nga fai pawh phur mah ila kan sut leh vek ang a, kan chak ngei ang tih kan hre tlat a ni. Kan khelmualah kher hi chuan team ṭha tak kan ni," a ti.
Phullêm an phah a, football khelmual pangngai aiin a zim. A chhan chu tlang awih panga awm a ni a, zawl zau a awm thei lo. Tuna an stadium hi club a din aṭanga kum 35-na, 2009 khan an puitling chauh.
Boruak kham khawp awm lohna hmuna stadium an din tlat nachhan hi a chiang a. Mikhual tan an inkhelh rei hnuin thawk a harsa a, an zuai ṭhin. Mahse, awih panga awm a ni a, mipui tan inkhel enna hmun a awm mang lo.
Khelmual thlang lamah ball liam danna tur lên sang deuh a tluanin an zar a. Hetiang a nih loh chuan chet sual palha khama lum mai pawh awl tak a ni ang.
Ball liam avangin harsatna an tawk nasa viau a, an chhut dan chuan tun kum 40 chhungin ball 1,000 vel liamin a bo tawh.
Defender Alfons Brigger chuan : "Ball a liam duh a, metre 100 vel a lum ṭhin. A chang phei chuan metre 200, 300 vel lai a lum. Vawi khat inkhelhah lum miah loh chang awm ve mah se 10 lai a lum chang pawh a awm. Inkhelh zawha training kan neih hmasak berah kan zawng leh fo mai," a ti.
FC Gspon hian a hmuna inkhel entu pawh an ngah hran lo; khaw vawh laia an khelh phei chuan mi pathum emaw pali emaw tlin loh chang pawh a awm. A tlangpuiin mi 40 aṭanga 50 velin an en a, a entute hi Gspon khua leh an ṭhenawm Staldenried aṭanga kal khawm an ni a, Staldenried hi Gspon aiin a lian a, a changkang zawk hret bawk.
An stadium-in Switzerland leh Bayern Munich coach hlui, German pachal Ottmar Hitzfeld-a hming a chawi daih hi a mak ve viau.
2008 aṭangin European Mountain Village Championship khelh ṭan a ni a, FC Gspon khelmualah hawn niin a hawngtuah Hitzfeld an hman avangin an a hawngtu hi an stadium hming atan an chawi zui ta a ni.
Thang khuma T-a
No comments:
Post a Comment
COMMENT RAWH