SYNOD OF ICE - SYNOD OFFICE

Ni hnih thum liam taah khan social media-ah Synod office signboard hawrawp pakhat tla avanga SYNOD OFFICE chu, SYNOD OF ICE tia chhiar ngai lo ni ta thlalak a darh vak a. Khaw vawh em em lai a lo ni bawk a, a hunlai nen a inhmeh angreng viau mai a.

Hemi hma deuh hian social media influencer tia chhal ve mai theih tur, David Sailo thuziak ṭhenkhatah Synod hnuaia thawk; hun puma rawngbawltu pakhatin cheng nuai 70 chuang a tihchingpen thu leh, chumi chu hrem ahnekin Synod hotuten hmunpui lamah an sawn ringawt a ni awm e, tih thu kan hmu a. He thuziak hi a lar cher cher hle a, Youtube lamah pawh ngaihthlak peih chuan ngaihthlak tur a awm nghal ṭeuh mai a, mipuiin thudik a nih leh nih loh phei chu kan hre lem hlei lo a, rinthu kan insawisiak luih luih a. Synod office lam chu an ngawi hle hle mai a, a thu serious dan thlirin David Sailo thuziak hi a dik lo a nih chuan ráwlte pawh rawn chhuah ve awm tak an ni a.

A inti hre ril deuh chuan he rawngbawltu chungah hian Synod-in kut a thlak tawh an ti a, mahse, mipui hriatah engmah puanzar a ni chuang lo a. Mi tam zawk chuan amah pawh chu kan hre ta chuang hlei lo a, mi ṭhenkhat phei chuan, “David Sailo khan rawn auchhuahpui lo se chu an transfer satliah ringawt ang,” te an ti vel lehnghal a, Corruption Do Kum te erawh kan lo puang ve tawh ṭhin lawi a! Ka ngaihtuah mai mai a, kohhranah hian transparency a awm lo ber zawk alawm an tih hi a dik riau chang a awm a. Tin, sorkar hian officer eiruk chingho hi hrem ta hmiah hmiah mai se kohhran hi kan buai ber mai awm mang e aw ka ti bawk a, sawi thui lo mai ila. Han ngaihtuah zui ve mai zawk teh u.

Tlem lai deuha kan unaupa lo zin ṭumin Synod office a lo han dawr a, a lo haw chu a rawn lunghnur hle mai a, “Delhi-a office dawr hrehawm bera an sawi ai pawhin dawr an hrehawm zawk a, ka ṭanpui thei che ang em (may I help you) attitude an nei lo a, mi i va rawn mamawh em em ve maw le tih melhin min lo melh a, chutiang rilru pu chuan min lo dawngsawng ni deuh berin ka hria,” a rawn ti haw mauh mai a, an lo meng vawt hle emaw ni dawn ni, SYNOD OF ICE tih nen pawh an inhmeh mah mah ang tih a hlauhawm hlel lo e.

MZU zirlai ṭhenkhatin project pakhat an nei a, chu an project-ah chuan Aizawl khawpuia office hrang hrangte dawr kualin dawr nuam leh nuam lote an thlang a, index mumal tak pein mipui hriatah tarchhuah an tum a. Mahse, dawr nuam lo ber zingah Synod office a tel tak nulh avangin kohhran hmaizah avangin an survey finding an puangzar duh ta lo a, “Kan tih leh hunah chuan kan tlangzarh hrim hrim tawh ang,” an ti a ni awm e.

Presbyterian kohhran hian Mizoram chhunga kohhran dangte lakah nu leh pa chan an chang thiam a, mi chung en an ni bawk a, kohhran pawl dangte hrethiamtu leh a ṭul a nih phawt chuan chak lote pawh dawm kangtu an ni fo zawk ṭhin a. Mahse, tunah chuan kohhran tenau zawkte cho khet khet tawk velah an indah hniam ta niin a lang a, kohhran dangte laka hriatthiamna rilru put tihte leh, chak lo zawk indàwmkan tihte chu hmanlai thawnthu ngaihnawmah a chang chho ta zel a ni ber mai.

Mizorama Chanchinṭha thlen ni kan sawisak duh dan aṭang ngawt pawh hian Mizoram Presbyterian kohhran hian hotu patling, rilru zau leh pa ber rilru pu (fatherly figure) a tlachham tawlh tawlh tih a lang reng a, tunhmaa nau anga a en ṭhinte pawh a cho tawk an ni tawh a, a insualpui ta awrh awrh zel mai a ni hi. Hetiang zel a nih chuan Mizoram Presbyterian kohhran huhang hi zawi zawiin a chuai hret hret dawn a ni mai thei a, hriat loh karah hian a chuai hle tawh pawh a ni mai thei a ni.

Kan hotu hmasate khan Mizoram Presbyterian kohhran hi Mizoram chhung chu sawi loh, India ram pum bakah khawvel pum huap pawhin rawngbawlna peng hrang hrangah khaitu, uaptu leh chhem alhtu ni zel turin sûl an lo su a, India ramah leh khawvel hriatah nu leh pa chan an lo chang ve ngar ngar ṭhin. Mahse, tunah chuan hotu an inthlak zel a, tling leh tlak aiin ‘tling ve tho’ tihte, ‘ṭha ve tho’ tihten office an awp ta a, department hotuah te an ṭhu ta fir fer a, Kohhran Upa senior tak pakhat chuan, “Hotu hmasate thawhrim zar zovin an ropui ta lutuk deuh a, an ngaihtuahnain an dawhkan zímté bak a pel thiam tawh lo,” a ti! Heng thute hi thu tak tak a nih chuan a pawiin a vanduaithlak hle dawn a ni.

Mipuiin SYNOD OF ICE vawt rim rem ai chuan, SYNOD OF GRACE ngainatawm kha hmuh zel kan duh a ni.

- Dr. V. Zothanmawia

He thu ziak hi Vanglainia chhuah hmasak, a ṭhat reuh em vanga copy a ni. A dim em tih erawh kan hre bik lo