Aw Khawngaihtu Pathianin by Chawngkhupa

 Aw, khawngaihtu Pathianin,

Kan thinlung chhungah hian;
Thlarau min pek lawmna hi,
Khawvel finin a zo lo ve.

Mihring mihrinna hianin,
A ngaihtuah chhuak zo lova che,
Ka chhandamtu i thuruk hi.

A thukin a va sang em!
Khawvel fin zawng aiin!
Pathian hmangaihna thu hi,
Van leh khawvelan a khat e.

Aw, kei mi sual bo hnu hi,
A khawngaihna zarah;
Thlarau min pe, nunna hi,
Aw, ka nunna, Lalpa fak rawh.

Chang hnihna bul hi a original chu "Aw, a va sang em" tih a ni a. A thu hi lam (syllables) 5 chiah a ni a. Pu Chawngkhupa hian pa-nga hi pathian thuah sawi uarna niin a ngai a. A thu pawh lam nga chiah turin a dah a. Thluk dang nen a lo inkhuangrual si lo va. A hriatpui leh pathian a dil angin "A thukin a va sang em" tiin an dah leh a. Amah chuan "Aw, a va thuk em" tia sak chang a nei thin a ni. 

Dumde ruang chen awmzia

 "Dumde ruang chen" chuan "vaihlo beng khat zuk chhunga kal thui zawng" tiin. 

 Dumde kan hriat thin chu rannung thlawk thei a lu a eng vet vet thei a ni a, pangngangah poh a awm bawk. Eng vanga Vaihlo chu dumde lo ni ve ta mai nge?

 Mizopa inah chuan Dumbur a awm thin a, chu chu vaihlo dahna a ni. Vaihlo hi Paihte tawng chuan 'Dum' a ni a, chuvang chuan vaihlo bur chu Dumbur an lo ti ta a ni. Chutichuan vaihlo chu vaibelah an beng a, meiin an dep a, a lo ling ta a, a lo de ta ve ve a. Vaihlo de ta ve ve chu Dumde chu a lo ni ta a nih chu. Fawh miah loh chuan a ling rei thei lutuk lo a. Kal pahin fawh reng sen a ni lo bawk a. Chutianga a lin chhunga kal thlen phak tawk ang chu dumde ruang chen chu a ni mai. Beng khat zuk zawh ai mahin vawi khat lak kai daih tawk vel a kawk mah thin.

Dumde ruang chen tih hian dumde thlawk thei ni lovin, vaibela vaihlo vam sen sawina a ni e.